‘Sulm ndaj demokracisë’, udhëheqësit evropianë shprehin tronditje për trazirat në Capitol Hill

Sulm ndaj tempullit të demokracisë, skena të turpshme në Capitol Hill. Ishin këto reagimet e para të shumë prej liderëve botërore pas trazirave që përfshinë Uashingtonin, ku mbështetës të Donald Trump mësynë në Kongres dhe u përplasën me policinë në përpjekje për të ndalur certifikimin e fitores së Joe Biden.

Ish-presidentët Bush dhe Obama po ashtu reaguan. Obama tha se sulmi është nxitur nga “një president, i cili vazhdon të gënjejë për rezultatin e zgjedhjeve të ligjshme”. Ai shtoi se historia do ta mbajë  mend sulmin në Kongres si një “një moment të çnderimit dhe turpit të madh për kombin”.

“Janë pamje të sëmura dhe pikëlluese. Rezultatet e zgjedhjeve kontestohen kështu në një banana-republikë, jo në republikën tonë demokratike”, do të shkruante ish-presidenti Bush.

Përshkruar si skena të paprecedenta në ‘shtëpinë e demokracisë’, liderët e Bashkimit Evropian e cilësuan një sulm ndaj demokracisë amerikane.

“Një shok të shohësh skena të tilla në Uashington”, shkroi në Twitter presidenti i Këshillit Evropian, Charles Michel.

Duke nënvizuar se mezi pret të bashkëpunojë me presidentin e zgjedhur Jo Biden, presidentja e Komisionit Evropian, Urusla von der leyen u shpreh se besonte në forcën e institucioneve amerikane.

Edhe kryeministri britanik, Boris Johnson i përshkroi skenat si të turpshme duke shkruar se transferimi i pushtetit duhet të jetë i qetë.

“Trump dhe mbështetësit e tij duhet të pranojnë vendimin e votuesve amerikanë dhe të ndalojnë së penguari demokracinë”, ishte reagimi i ministrit të Jashtëm gjerman, Heikko Mass.