Sulm terrorist në Zelandën e Re, agresori plagos me thikë 6 persona, vritet nga policia

Rikthehet frika e sulmeve terroriste në Zelandën e Re. Policia vrau një ekstremist i cili pasi kishte hyrë në një supermarket në Auckland plagosi me thikë gjashtë qytetarë. Vrasja e tij ndodhi vetëm 60 sekonda pasi sulmoi qytetarët.

Kryeministrja e vendit e Jacinda Ardern e cilësoi një sulm terrorist.

Ajo theksoi se agresori kishte mbërritur në Zelandën e Re në vitin 2011 dhe nga viti 2016 ishte në survejim nga autoritetet e sigurisë kombëtare. Çështja ka ngritur shumë pikëpyetje se përse nuk u ndërmorën veprime përpara se të plagoste gjashtë persona.

Agresori i cili ende nuk është identifikuar, sipas autoriteteve ishte frymëzuar nga grupi terrorist ISIS.

Në mars të vitit 2019, Zelanda e Re u godit nga një sulm terrorist, ku mbetën të vrarë 51 persona dhe autori vitin e kaluar u dënua me burgim të përjetshëm.

Një ngjarje e tillë vjen në momentin kur shqetësimet janë shtuar pas ardhjes në pushtet të talebanëve në Afganistan dhe një tjetër grupi më ekstremistë të njohur si ISIS-K.