Sulmi i 11 shtatorit, Biden firmos urdhrin që të publikohen dokumentet e klasifikuara

Presidenti Joe Biden nënshkroi të premten një urdhër ekzekutiv për publikimin e disa dokumenteve sekrete të lidhura me sulmet terroriste të 11 shtatorit 2001.

Për këtë vendim kreu i Shtëpisë së Bardhë u shpreh se ka bërë një premtim për transparencë dhe tani është koha për ta zbatuar. 

Ky urdhër vjen një javë para 20 vjetorit të sulmeve, dhe është një moment domethënës në një debat shumëvjeçar mes qeverisë dhe familjarëve të viktimave.

Prej kohesh ata kërkojnë të zbulojnë më shumë të dhëna rreth ngjarjes tragjike. Familjarët i kanë kërkuar qeverisë amerikane të hetojë dyshimet e tyre se FBI ka gënjyer ose shkatërruar provat që lidhin Arabinë Saudite me terroristët.

Muajin e kaluar rreth 1,800 të afërm të viktimave, të mbijetuar e të tjerë thanë se ishin kundër pjesëmarrjes së presidentit amerikan Biden në ngjarjet përkujtimore të 11 shtatorit 2001 nëse dokumentet mbeteshin sekrete.

Urdhri udhëzon Departamentin e Drejtësisë të fillojnë një rishikim të dokumenteve dhe kërkon që ato të publikohen gjatë gjashtë muajve të ardhshëm.