Sulmi ndaj urës së Krimesë, FSB arreston 8 të dyshuar, akuza shërbimeve ukrainase

Shërbimi rus i sigurisë, FSB, ka publikuar një video që tregon kamionin e përfshirë në sulmin ndaj urës së Krimesë. Ndërsa pamjet nuk janë verifikuar ende në mënyrë të pavarur, agjencia ka bërë gjithashtu me dije se ka arrestuar 8 të dyshuar.

FSB deklaron se kamioni ishte mbushur me eksploziv dhe ishte nisur nga porti ukrainas i Odesës, pasi kishte përshkuar një aks që kalonte nga Bullgaria, Gjeorgjia dhe Armenia.

Sipas saj, autoritetet kanë vënë në pranga 5 shtetas rusë dhe tre shtetas të tjerë ukrainas dhe armenë, që kishin vepruar për llogari të shërbimit sekret ushtarak ukrainas. Nga ana e saj, Ministria e Mbrojtjes në Kiev i ka hedhur poshtë akuzat.

Ura e gjatë 12 km mbi ngushticën e Kerçit përbën një nyje të rëndësishme lidhjeje mes jugut të Rusisë dhe Krimesë, që u aneksua ilegalisht nga Moska në 2014-n.

Autoritetet po përpiqen të riparojnë rrugën dhe linjën hekurudhore që ndodhen në strukturën e dëmtuar. Si hakmarrje ndaj sulmit, Rusia ndërmori një seri bombardimesh në mbarë Ukrainën.

LEXONI GJITHASHTU:

• Ura drejt Krimesë, Ukraina hap hetim penal për kalimin e një treni pasagjerësh
• “Ky është fillimi”, reagon zyrtari ukrainas për shpërthimin në urën e Krimesë