Taksat dhe masat kufizuese shqetësojnë sektorin e turizmit përpara sezonit veror

Shoqata Shqiptare e Turizmit (ATA) pret nga qeveria që ta ndihmojë sektorin e turizmit me lehtësira fiskale, lehtësira që sipas zëvendësministres së Turizmit janë mundësuar.

Duke pranuar se në tërësi ka pasur përgjigje të kënaqshme për disa problematika, Matilda Naço, drejtore ekzekutive e ATA, tha në emisionin “Ilva Now” në Euronews Albania se qeveria nuk ka njësuar taksat që i aplikohen restoranteve me ato që u aplikohen hoteleve.

“Të dy sektorët dhe nënsektorët e turizmit janë pothuajse gropë, nuk ka heqje taksash vendore nuk ka një mori gjërash që janë për situatën [e pandemisë] përfshirë këtu edhe pagesën e punonjësve [me ndihma ekonomike nga qeveria] nuk ka më,” – theksoi Naço.

Përballë drejtueses së ATA-s reagoi zëvendësministrja e Turizmit Ornela Çuçi e cila theksoi se nga qeveria është ndërhyrë në sistemin e taksave për turizmin.

Për sektorin e turizmit zëvendësministrja Çuçi tha se tatimi për akomodimin në hotele është ulur nga 20% në 6%, por ekspertja Naço replikoi se kjo taksë duhet të ishte e njëjtë edhe për restorantet dhe se lënia jashtë i penalizon.

“Problematikat janë pafund […] kapacitetet [mirëpritëse] nuk i kemi për t’iu përgjigjur turizmit masiv, turizmi kulturor është goditur fort [nga pandemia] nuk ka pasur rezervime në grupe, shpresojmë që gjërat të ndryshojnë në periudhën e vjeshtës,” – shtoi drejtorja e ATA-s.

Sipas Znj. Naço sasia mesatare e shpenzimeve të një pushuesi për një javë në Shqipëri është 390 dollarë ndërsa në Kosovë është diçka më shumë se dyfishi i kësaj shume. Kjo sipas saj është shqetësuese sepse sektori i turizmit nuk merr maksimumin, ndërsa nga analizat e institucioneve mungojnë të dhënat e përthelluara.

“Nuk kemi akoma një sistem që të vlerësojë situatat, ku jemi?! Numërojmë vetëm ca njerëz që hynë dhe dalin, por kjo nuk mjafton, duhet të kemi një sistem,” – këmbënguli Naço.

Zëvendësministrja Çuçi replikoi duke këmbëngulur se orientimi kryesor mbeten shifrat e Institutit të Statistikave. Ajo shtoi se përmirësimi i infrastrukturës ka ndikuar në flukset e turistëve në Rivierë dhe se hapja e rrugëve të reja do të japë frute për sektorin e turizmit edhe këtë sezon.

LEXONI GJITHASHTU:

• Zv/ministrja Çuçi: Testet e shpejta në qendrat shëndetësore të bregdetit, një nga masat për turizmin
• Ekspertja e turizmit: Kanë nisur të vijnë turistët e parë nga Ukraina dhe Polonia
• Kryetari i Unionit të Turizmit në Kosovë: Shpresojmë që pushuesit të zgjedhin Shqipërinë
• Tatyana Bajraktari: Një çift turistësh të huaj shpenzon rreth 800 euro në javë në Shqipëri
• Ermal Sulaj: Shqipëria duhet të përqendrohet më tepër te turizmi malor