Të Gjelbrit pro koalicionit qeverisës me SPD dhe FDP, mbështesin nisjen e bisedimeve

Partia e të Gjelbërve në Gjermani gjatë kongresit të zhvilluar një ditë më parë votuan për të mbështetur nisjen zyrtare të bisedimeve për të hyrë në koalicion me Social Demokratët dhe Liberalët. Tre parti të cilat pritet të formojnë qeverinë e ardhshme të Gjermanisë.

“Ne kemi shansin të marrim përgjegjësinë dhe të luajmë një rol vendimtar në qeveri. Jemi të lumtur që përballemi me këtë përgjegjësi”, shkruhet në postimin e partisë në Twitter.

Të Gjelbrit dolën në vendin e tretë në zgjedhjet e 26 shtatorit me gati 15% të votave, duke u bërë një faktor i rëndësishëm në formimin e një qeverie koalicioni. Ndër prioritetet e Partisë së Gjelbër janë mbrojtja e klimës dhe forcimi i drejtësisë sociale.

Tri ditë më parë, Të Gjelbërit së bashku me Partinë Social Demokratike (SPD) dhe Partinë Demokratike të Lirë (FDP) bënë me dije se pas bisedimeve do të nisin negociatat e koalicionit qeverisës. Ndarja e posteve pritet të jetë vendimtare për profilin programor të partive dhe suksesin e negociatave.

FDP miraton bisedimet zyrtare gjatë ditës së hënë. Qeveria  e re gjermane do të ishte në drejtimin e socialdemokratit Olaf Scholz, zëvendës-kancelar dhe ministër i Financave, partia e të cilit fitoi zgjedhjet e 26 shtatorit.

Një qeveri e përbërë nga SPD, Të Gjelbërit dhe FDP, e njohur si një koalicion semafor për ngjyrat e partive, do të vendoste në opozitë për herë të parë në 16 vite Kristian Demokratët (CDU) e Angela Merkelit. Kandidati për kancelar i CDU, Armin Laschet mori përgjegjësinë për humbjen e partisë në zgjedhje, duke bërë thirrje për unitet brenda partisë.