Të paktën 41 të vdekur nga shpërthimi në minierën turke, 350 metra nën tokë

Të paktën 41 persona kanë mbetur të vdekur pas një shpërthimi në një minierë qymyri në provincën veriore Bartin të Turqisë, tha të shtunën presidenti turk, Rexhep Tajip Erdogan.

Më herët, ministri i Brendshëm turk, Suleyman Soylu, tha se 58 nga 110 personat që punonin në minierë kur ndodhi shpërthimi u evakuan nga ekipet e shpëtimit ose dolën vetë.

“Aty vazhdon ende zjarri, minatorët dhe ekipet kanë bërë sakrifica të mëdha për të mos lënë vëllezërit e tyre atje”, tha ai.

Ministri i Energjisë, Fatih Donmez, tha më vonë se zjarri në minierë ishte vënë përgjithësisht nën kontroll, por përpjekjet për izolimin e tij po vazhdonin pas incidentit që ndodhi 350 metra nën tokë.

Autoritetet turke thanë se Prokuroria ka nisur një hetim për shkakun e incidentit, por sipas të dhënave fillestare shpërthimi ishte shkaktuar nga metani në minierë.

LEXONI GJITHASHTU:

• Shkon në 40 numri i viktimave nga shpërthimi në minierën në Turqi
• Shpërthim në minierën në Turqi| 28 viktima, dhjetëra të tjerë të bllokuar