Të paktën 52 të vrarë nga sulmet izraelite në Liban, mbi 28 mijë të zhvendosur

Sulmet izraelite në Liban kanë lënë të paktën 52 persona të vrarë dhe 154 të plagosur të hënën, sipas një bilanci të përditësuar nga qeveria libaneze.

Një shifër e mëparshme e publikuar nga Ministria e Shëndetësisë raportonte 31 viktima dhe 149 të plagosur, por të dhënat u rishikuan pas përditësimit të situatës në terren.

Bombardimet goditën zonat e Libanit jugor dhe lindor, si edhe periferitë jugore të Bejrut. Si pasojë e sulmeve, më shumë se 28,500 persona janë zhvendosur, sipas njësisë qeveritare për menaxhimin e fatkeqësive.

Situata mbetet e tensionuar, ndërsa autoritetet po vijojnë vlerësimin e dëmeve dhe pasojave humanitare.