Tensionet Greqi-Turqi, ministrat e Jashtëm përplasen në konferencën për shtyp

Ministrat e Jashtëm të Turqisë dhe Greqisë u përplasën hapur të enjten, në konferencën e përbashkët për shtyp në Ankara. Ajo që nisi me shpresën e përmirësimit të marrëdhënieve, shumë shpejt degradoi në akuza nga të dyja palët.

Në përpjekje për të lehtësuar tensionet mbi çështjet territoriale në lindje të Mesdheut, shefi i diplomacisë greke, Nikos Dendias takoi presidentin turk Recep Tayyip Erdogan dhe ministrin e Jashtëm, Mevlut Cavushoglu, në vizitën e parë që nga momenti kur marinat e dy vendeve rrezikuan përplasjen vitin e kaluar.

Megjithatë, ajo që nisi si një atmosferë e përzemërt ndryshoi kur Dendias deklaroi se shkelja e sovranitetit të Greqisë do të përballet me sanksione.

“Në këtë aspekt, Bashkimi Evropian doli me një qëndrim me dy opsione. Ai për të marrë masa është gjithmonë në tryezë, nëse Turqia vijon të shkelë sovranitetin tonë dhe do të implementohet nëse Ankaraja ndjek këtë kurs. Me gjithë zemër, ne shpresojmë që kjo të mos ndodhë”, u shpreh Nikos Dendias, ministër i Jashtëm i Greqisë.

Nga ana e tij Cavusoglu i cilësoi komentet si “të papranueshme”.

“Unë shpresoja që ky takim do të vazhdonte me atmosferën pozitive, por për fat të keq Nikos Dendias bëri një akuzë tërësisht të papranueshme ndaj vendit tim në fjalimin e tij. Ai tha se Turqia shkeli sovranitetin e Greqisë. Këtë nuk mund ta pranojmë në asnjë rrethanë”, deklaroi Mevlut Cavusoglu, ministër i Jashtëm i Turqisë.

Megjithatë, në fund të dyja palët deklaruan se dëshirojnë të tejkalojnë mosmarrëveshjet përmes dialogut.

Lexoni gjithashtu:

Bisedimet Turqi-Greqi, ministri Jashtëm grek Dendias takohet me presidentin turk Erdogan