Tentuan të shisnin një statujë antike për 40.000 euro, në pranga tre persona në Greqi

Tre persona janë vënë në pranga nga policia greke, pasi u përpoqën që të shisnin një statujë antike të perëndeshës greke “Hecate”.

Statuja prej mermeri besohet ta ketë origjinën nga shekulli i dytë ose i tretë pas Krishtit, kur Greqia ishte pjesë e Perandorisë Romake.

Ishin autoritetet e Selanikut ata që raportuan se dy persona kishin tentuar të shesin statujën në këmbim të një shume prej 40,000 euro.

Zbulimi u bë me anë të policisë, e cila infiltroi një oficer si blerës të interesuar dhe ky i fundit negocioi çmimin me dy të dyshuarit.

Policia deklaroi se dy të arrestuarit janë të moshës 56–vjeçare dhe u vunë në pranga të premten, pasi u pa se zotëronin statujën e rrallë.

Gjithashtu u arrestua edhe një person i tretë, pasi dyshohet se pranoi që e kishte gjetur statujën në fermën e tij, në Pelas dhe ua dha dy burrave për ta shitur.

Statuja prej mermeri është 33 centimetra e lartë dhe 16 centimetra e gjerë, dhe peshon 10 kilogramë. Policia ka shtuar se kjo statujë mbart “vlerë të madhe arkeologjike”.

Në Greqinë e lashtë, Hecate nderohej si një perëndeshë e botës së nëndheshme, e aftë si për të bërë mirë dhe keq njëkohësisht. Figura e saj lidhet me magjinë, hënën dhe krijesat e natës.

Mbi tre të arrestuarit rëndojnë dy akuza, pjesëmarrja në një grup kriminal dhe shkelja e ligjit grek për mbrojtjen e antikuarëve dhe trashëgimisë kulturore.

Policia ka sekuestruar gjithashtu një motor që i përkiste njërit prej burrave, motor i cili u përdor për të transportuar statujën nga zona Pelas, deri në Selanik.

Tre të arrestuarit do të paraqiten para një gjykatësi, të martën.

LEXONI GJITHASHTU:

• Vapa ‘shkrin’ Greqinë, i nxehti afrikan sjell pluhur në rajonin e Atikës
• Piloti grek pranon vrasjen e gruas së tij britanike javë pasi inskenoi grabitjen