Tërheqja nga konventa e grave, Erdogan: Është çështje e mbyllur, Perëndimi të mos përzihet

Presidenti turk Recep Tayyip Erdogan deklaroi të premten se tërheqja nga traktati evropian kundër dhunës ndaj grave është një fakt i kryer dhe askush nuk duhet të përzihet në të.

“Ne e morëm vendimin tonë, u tërhoqëm, ashtu siç e kishim nënshkruar. Askush nuk duhet të fusë hundët në këtë çështje. Ne e bëmë dhe njoftuam Këshillin Evropian. Është një çështje e mbyllur tashmë”, u shpreh presidenti i Turqisë.

Javën e kaluar, Erdogan tërhoqi papritur Turqinë nga konventa e Stambollit, në kuadër të të cilës vendi zotohej të parandalonte dhunën në familje dhe të promovonte barazinë.

Ndërkohë, mijëra gra kanë protestuar në Stamboll dhe qytete të tjera, duke i bërë thirrje qeverisë që të anulojë dekretin presidencial. Tërheqja nga ky traktat që mbron gratë nga dhuna në familje, është tronditëse për mijëra gra.

 “Ne e kundërshtojmë me forcë këtë pasi shumë gra janë të vetëdijshme se Konventa e Stambollit është një traktat që tregon përgjegjësitë e shtetit dhe jo të individëve. Është një traktat që pengon dhunën në familje. Tërheqja është tronditëse”, u shpreh një qytetare në Turqi.

Procesi zyrtar i tërheqjes nga konventa do të përfundojë në tre muaj.