Tha se askush nuk interesohet për operën, Andrea Bocelli e fton Timothée Chalamet në koncertin e tij 

Andrea Bocelli i është përgjigjur komenteve të fundit të Timothée Chalamet në lidhje me operën dhe baletin duke e ftuar atë në një koncert në mënyrë që t’i përjetonte ato nga afër. Në një intervistë për People, tenori tha se ishte i befasuar nga deklarata e aktorit, e cila kishte lënë të kuptohej se këto janë forma arti për të cilat “askush nuk interesohet”.

“Shpesh mbajmë distancë nga diçka që nuk e kemi përjetuar vërtet”, tha Andrea Bocelli, duke shtuar: “Opera dhe baleti janë arte që kanë kaluar shekuj dhe vazhdojnë të prekin zemrën njerëzore, sepse ato i përgjigjen një nevoje të thellë për bukuri, të vërtetë dhe emocion”. Ai shtoi: “Ato nuk janë arte të së kaluarës, por gjuhë të gjalla që vazhdojnë të na lëvizin, të na bëjnë të mendojmë dhe të bashkojnë breza të ndryshëm”.

Tenori, i cili ka shitur mbi 90 milionë disqe në të gjithë botën, tha se do të ishte i lumtur ta mirëpriste aktorin në një nga koncertet e tij: “Jam i bindur se një artist i ndjeshëm si Timote mund të zbulojë një ditë se opera dhe vallëzimi burojnë nga i njëjti burim emocionesh. Nëse në një moment ai është kurioz, unë do të jem i lumtur ta mirëpres si të ftuar në një nga koncertet e mia. “Ndonjëherë duhen vetëm disa minuta duke e dëgjuar këtë muzikë drejtpërdrejt për të kuptuar pse, pas kaq shumë shekujsh, ajo vazhdon të jetë e dashur në të gjithë botën”, vuri në dukje ai.