Thaçi: Në SHBA nuk do të diskutohet territori i Kosovës

Presidenti i Kosovës, Hashim Thaçi, tha se do të kthehet nga Uashingtoni me një marrëveshje finale në përputhje me Kushtetutën e Kosovës, pa shkëputje territori dhe pa cenuar sovranitetin e vendit.

Pas ftesës nga Grenell për t’u takuar në SHBA, Thaçi tha se ka besim të plotë që me mbështetjen e Amerikës do të arrihen rezultate konkrete.

“Kështu ka qenë në Rambuje, në Vjenë. Kështu do të jetë dhe në Uashington”, tha presidenti.

Ai theksoi se SHBA po udhëheq dialogun, dhe, për sa i përket marrëdhënies së SHBA me BE, nuk i takon Kosovës të pretendojë se mund të ndërhyjë. Megjithatë, ai është i sigurt se mes palëve do të ketë një veprim të koordinuar.

Presidenti e theksoi sërish se në këtë takim nuk do të diskutohet integriteti territorial i vendit.

“Baza jonë do të jetë respektimi i kushtetutës. E theksoj me transparencë se nuk pretendohet nga askush, as në Uashington, që të cenohet integriteti i Kosovës”, tha Thaçi.

Për sa i përket Lajçak, presidenti tha se nëse ka ardhur në Kosovë për humultime të mëtejshme, nuk ka nevojë të takohen, pasi Kosova është humultuar mjaftueshëm. Nëse ka propozime konkrete, nuk ka arsye për të mos u takuar.

Presidenti Thaçi përsëriti dhe një herë kërkesën për liberalizimin e vizave për qytetarët e Kosovës.