Trafiku i qenieve njerëzore, KE zbulon strategjinë e re kundër krimit të organizuar

Komisioni Evropian zbuloi një strategji të re për t’u përballur me krimin e organizuar dhe trafikun e qenieve njerëzore, përfshirë një propozim drejtuar Interpol-it për një marrëveshje për shkëmbimin më të shpejtë të informacionit.

Vetëm nga trafiku i qenieve njerëzore ka pasur 14 mijë e 145 viktima në vendet e Bashkimit Evropian, 50% e të cilave shtetas të BE-së.

Ndërkohë, 72% e të gjitha viktimave janë gra dhe vajza, 92% e të cilave të trafikuara për shfrytëzim seksual.

Margaritis Schinas, zëvendës president i KE-së, tha se kjo është një luftë që Evropa mund ta fitojë.

 “Nuk ka dyshim që trafiku i drogës dhe i qenieve njerëzore janë dy aspekte veçanërisht shqetësuese, por nuk janë të vetmet. 9 aktivitetet më të mëdha kriminale në Evropë gjenerojnë rreth 140 miliardë euro fitime, rreth 1% e GDP-së së Unionit. Ndaj është diçka që s’mund ta neglizhojmë, por me të cilën duhet të përballemi”, u shpreh Margaritis Schinas, zëvendës president i KE-së.

Strategjia e re do implementohet në periudhën 2021-2025 dhe synon të zhbëjë bizneset kriminale online dhe offline dhe të mbështesë viktimat.

Gjithashtu, KE do të organizojë një fushatë komunikimi me përfaqësues të vendeve anëtare dhe shoqërisë civile, që do ketë në fokus ndërgjegjësimin e qytetarëve nga rreziku i trafiqeve.