“Tre trupa të pavarura”, si e  ndryshoi Kodi i ri Zgjedhor KQZ-në?

Reforma e tetë zgjedhore në 30 vjet, ajo e cila u përmbyll me votimin e ndryshimeve të Kodit Zgjedhor në 29 tetor, ndryshoi rrënjësisht përbërjen dhe funksionimin e Komisionit Qendror të Zgjedhjeve.

Në emisionin ‘Me pak fjalë’ në Euronews Albania u sqaruan ndryshimet kryesore që reforma solli në organin kryesor të menaxhimit të zgjedhjeve.

Deri tani, KQZ përbëhej nga një trupë e vetme me 7 anëtarë që merrte vendime përmes votimit për tre aspektet kryesore të zgjedhjeve: caktimin e kritereve dhe rregullave nënligjore për zgjedhjet, organizimin dhe mbajtjen e zgjedhjeve, si dhe shqyrtimin e ankimimeve në lidhje me procesin zgjedhor.

Me ndryshimet e fundit të Kodit Zgjedhor, KQZ është ndarë në tre trupa të pavarura nga njëra-tjera, për secilin nga tre funksionet e KQZ-së – në thelb një strukturë që imiton organizimin e shteteve në tre pushtete: legjislativ, ekzekutiv dhe gjyqësor.

KQZ e re sot ka një trupë të përbërë nga pesë anëtarë, e quajtur “trupa rregullatore” – përgjegjëse për nxjerrjen e vendimeve dhe rregullave për administrimin e zgjedhjeve.

Një tjetër trupë, e përbërë përsëri pesë anëtarë, e quajtur “trupa ankimore”, e cila do të gjykojë ankesat e palëve të përfshira në procesin zgjedhor.

Niveli ekzekutiv mishërohet në një person të vetëm, të quajtur Komisioner Shtetëror i Zgjedhjeve, që ndihmohet vetëm nga një zëvendës.

Komisioneri është përgjegjës për organizimin teknik dhe administrativ të procesit të zgjedhjeve, në përputhje me ligjet dhe vendimet e trupës rregullatore të KQZ-së. Komisioneri shtetëror drejton gjithashtu gjithë administratën e KQZ-së.

Në tetor 2020, Kuvendi Zgjodhi Komisioner të parë Shtetëror të Zgjedhjeve, Ilirjan Celibashi i cili do të shërbeje për një periudhë 7-vjeçare dhe do të menaxhojë të paktën dy palë zgjedhje parlamentare.