Trump: Nuk do ta njoh Somalilandin – “A e di vërtet dikush se çfarë është ky vend?”

Donald Trump i tha gazetës New York Post se nuk ka ndërmend ta njohë pavarësinë e Somalilandit , duke hedhur poshtë vendimin e Izraelit për ta bërë këtë. “Jo”, iu përgjigj prerë Trump pyetjes së një gazetari, përpara se të shtonte: “A e di vërtet dikush se çfarë është Somalilandi?”

Vendimi i Izraelit për të njohur këtë provincë të shkëputur të Somalisë, e cila deri më tani nuk është njohur nga asnjë vend në botë, si shtet i pavarur ka provokuar zemërimin e Mogadishut dhe reagime të ashpra nga shumë vende të rajonit.

Bashkimi Afrikan gjithashtu e hodhi poshtë veprimin e Izraelit.

“Çdo përpjekje për të minuar unitetin, sovranitetin kombëtar dhe integritetin territorial të Somalisë (…) kërcënon të krijojë një precedent të rrezikshëm me pasoja të rëndësishme për paqen dhe stabilitetin në të gjithë kontinentin”, paralajmëroi kryetari i Komisionit të Bashkimit Afrikan, Mahmoud Ali Yusuf.

Një veprim i ngjashëm u bë dje nga ministrat e jashtëm të Somalisë, Egjiptit, Turqisë dhe Xhibutit.

“Ministrat shprehin refuzimin dhe dënimin e tyre të plotë të njohjes së rajonit të Somalilandit nga Izraeli, duke theksuar se mbështesin plotësisht unitetin, sovranitetin dhe integritetin territorial të Somalisë”, thuhet në një deklaratë të lëshuar nga Ministria e Jashtme egjiptiane pas një bisede telefonike midis Ministrit të Jashtëm egjiptian dhe homologëve të tij në Somali, Turqi dhe Xhibuti.

Somalilandi shpalli në mënyrë të njëanshme pavarësinë e saj në vitin 1991, ndërsa Somalia u zhyt në kaos pas përmbysjes së regjimit ushtarak të diktatorit autoritar Siad Barre. 

Që atëherë, ajo ka vepruar në mënyrë autonome, me monedhën e vet, ushtrinë dhe policinë, dhe stabilitet relativ krahasuar me pjesën tjetër të Somalisë, e cila është e rrënuar nga konflikte kronike politike, ndërsa përballet edhe me sulme nga rebelët islamistë të Shabaab. 

Megjithatë, deri më sot, asnjë vend tjetër nuk e ka njohur atë si shtet, duke rezultuar në izolim politik dhe ekonomik pavarësisht se ndodhet në një vendndodhje strategjike, në hyrje të Ngushticës Bab el-Mandeb, në një nga rrugët më të rëndësishme detare tregtare në botë, që lidh Oqeanin Indian me Kanalin e Suezit.