Presidenti i zgjedhur Joe Biden deklaroi të enjten se ishte presidenti Donald Trump që nxiti aktet e dhunës në Capitol Hill, duke e quajtur të mërkurën ditën më të errët në historinë e Shteteve të Bashkuara dhe një sulm ndaj demokracisë.
Duke folur nga lokaliteti Uillmington i Delauerit, ku ka prezantuar emërimet për Departamentin e Drejtësisë, Biden i quajti mbështetësit e Trump “terroristë të brendshëm”.
“Mos guxoni t’i quani ata protestues. Ata ishin një turmë rebelësh, kryengritësish, terroristë të brendshëm”, u shpreh Biden.
Ai akuzoi Trump se në 4 vite presidencë ka përbuzur demokracinë amerikane, Kushtetutën dhe sundimin e ligjit.
“Ai ka sulmuar institucionet tona demokratike që nga fillimi dhe e mërkura ishte kulmi i këtij sulmi të pandalur”, theksoi Biden, i cili shtoi se do t’i rikthejë dinjitetin Amerikës.
