Trupa e baletit të teatrit “La Scala’ në Itali jep shfaqje në ambient të hapur

Trupa e baletit të “La Scala” ka vendosur të dalë nga ambientet e teatrit prestigjioz, duke dhuruar një shfaqje në ambient të hapur për qytetarët. Eventi i mbajtur në qytetin e Milanos, në Itali, ka rezultuar një sukses pas mbylljes së gjatë për shkak të pandemisë.

Eventi u mbajt te Bagni Misteriosi në Milano, një pishinë historike e qytetit italian. Shfaqja ishte një homazh për kompozitorin argjentinas Astor Piazzolla, që revolucionarizoi tangon duke e ndërthurur me elementë të muzikës xhaz të viteve ’70 dhe ’80.

Qytetarët u shprehën të kënaqur me këtë nismë të “Las Scala”.

“Më pëlqeu shumë kjo nismë e teatrit La Scala. Mendoj se është shumë interesante sepse u jep njerëzve si unë, që nuk kanë një biletë sezonale, shansin për të ndjekur një performancë kaq prestigjioze”, u shpreh një zonjë.

Pas krizës së pandemisë që e largoi publikun nga eventet kulturore, kjo shfaqje në ambient të hapur rezultoi një sukses.

“Patëm këtë ide bashkë me disa miq që punojnë në “La Scala” për ta nxjerrë shfaqjen jashtë teatrit. Menduam se pas krizës së pandemisë ishte e nevojshme të ishim sërish në kontakt me publikun, jo vetëm me atë që jeton në qendër, por edhe me atë nga periferia”, u shpreh Dominnique Meyer, mbikëqyrës i “La Scala”.

Më 14 korrik, koncertet do të mbyllen me një ditë të hapur në teatër, që do të përmbajë një program me muzikën e Verdit, Rossinit dhe Puccinit.

LEXONI GJITHASHTU:

• Rikthehet  “La Scala” pas shtatë muajsh mbyllur, Teatri i Operas priti 500 artdashës