Turqia dhe Rusia apel OKB-së për zgjatjen e misionit humanitar në Siri

Turqia po zhvillon bisedime me Rusinë dhe anëtarë të tjerë të Këshillit të Sigurimit të OKB-së për zgjatjen e operacionit që mundëson kalimin e ndihmave për qytetarët sirianë.

Lajmin e bëri të ditur ministri i Jashtëm turk, Mevlut Cavusoglu, kur mungojnë 10 ditë nga përfundimi i mandatit të misionit.

Miliona njerëz në Siri varen nga ndihmat humanitare që aktualisht furnizohen nga një kalim i vetëm kufitar, ai që lidh Turqinë me veri-perëndimin e Sirisë.

Bëhet fjalë për një marrëveshje të autorizuar nga Këshilli i Sigurimit të OKB-së, zyrtarët e të cilit kanë paralajmëruar një katastrofë humanitare nëse mandati i misionit nuk ripërtërihet.

Duke folur përkrah ministrit të Jashtëm rus, Sergei Lavrov, në qytetin e Antalilas, Cavusoglu deklaroi se mandati, që skadon më 10 korrik, duhet të zgjatet.

“Është me rëndësi që rezoluta e Këshillit të Sigurimit për këtë kalim kufitar të zgjatet. Duke qenë se bëhet fjalë për ndihma humanitare, duhet ta zgjidhim problemin pa e politizuar. Ndaj, ne nuk po flasim vetëm me Rusinë, por edhe me anëtarët e tjerë të Këshillit të Sigurimit,” – tha Cavusoglu.

Nga ana e tij, Lavrov kritikoi aktin për mbrojtjen e civilëve sirianë të firmosur në 2020-n nga presidenti i atëhershëm amerikan, Donald Trump, që përmban sanksione të ashpra në dëm të presidentit sirian, Bashar al Assad.

LEXONI GJITHASHTU:

• Danimarka u revokon azilin sirianëve, 1000 persona protestuan përballë parlamentit kundër dëbimeve
• SHBA-ja, Franca dhe Britania kritika Bashar al-Assad për zgjedhjet presidenciale në Siri
• 10 vjet luftë në Siri, Papa Françesku bën thirrje t’i jepet fund konfliktit të armatosur