Ushtria europiane e nevojshme për krizat, thotë Borrell

Tërheqja kaotike e Perëndimit nga Afganistani ka gjasa të kthehet në një stimul për përpjekjet e Bashkimit Europian për të ngritur një ushtri të përbashkët.

Kështu ka deklaruar kryediplomati i Unionit, Josep Borrell, i cili ka theksuar se një forcë reagimi duhet të jetë pjesë e këtij projekti.

Thirrjet brenda BE-së, që blloku të mund të ndërhyjë ushtarakisht në një krizë pa u mbështetur tek trupat amerikane sa vijnë e po shtohen.

“Ndonjëherë ndodh diçka që vë në lëvizje historinë, që krijon një moment. Mendoj se ngjarjet e kësaj vere në Afganistan janë të tilla. Shpresoj që BE t’i kushtojë më shumë vëmendje kësaj çështjeje dhe të angazhohet në vendimmarrje konkrete,” – u shpreh Borrell.

Sipas Borrell, forca evropiane e ndërhyrjes së shpejtë duhet të përbëhet nga 5 mijë trupa, që të zëvendësojë një tjetër strukturë ushtarake të ngritur në 2007-n, por që nuk është vënë kurrë në përdorim.

Çështja ka qenë objekt debati i ministrave të Jashtëm të vendeve anëtare, në samitin informal të së enjtes në Slloveni, që do të zgjasë edhe të premten.

Të pranishmit kanë rënë dakord sa i përket rëndësisë së autonomisë ushtarake të Unionit nga Uashingtoni, por nuk kanë gjetur konsensus për trupat në terren.

Sa i takon marrëdhënieve me talebanët, shefi i diplomacisë evropiane ka shtuar se BE do të angazhohet në dialog, por në bazë të disa kushteve.

LEXONI GJITHASHTU: 

• Dialogu Kosovë-Serbi në takimin e ministrave të Jashtëm të BE, Borrell informon për takimin Kurti-Vuçiç
• Dialogu mes Kosovës dhe Serbisë, Borrell: Bashkëpunimi i fortë BE-SHBA do të ndihmojë palët
• Bosnja të përshpejtojë harmonizimin e politikave nëse do t’i bashkohet unionit, deklaron Borrell