Vaksina për të gjithë amerikanët, Joe Biden: 4 Korriku na gjen të çliruar nga COVID

Një vit pasi SHBA, sikundër e gjithë bota, u pushtuan nga COVID-19,  Presidenti Joe Biden në fjalimin e tij të parë televiziv përkujtoi viktimat, por duke dhënë edhe shpresë me planet e reja.

Kreu i Shtëpisë së Bardhë u shpreh se deri në 1 maj të gjithë qytetarët e rritur do të kenë akses në vaksina dhe 4 korriku pritet të festohet si dita e çlirimit nga virusi. Ai u ofroi amerikanëve shpresë,  por duke kërkuar edhe ndihmën e tyre.

Duke folur në Sallën Lindore të Shtëpisë së Bardhë, Biden bëri me dije masat për të shpejtuar vaksinimet, duke përfshirë rritjen e personave te kualifikuar në proces, vendosjen e 4,000 trupave shtesë në detyrë për të mbështetur përpjekjet e vaksinimit dhe duke lejuar më shumë njerëz të tillë si studentë të mjekësisë, veterinerë dhe dentistë, të shpërndajnë dozat e vaksinave.

Më shumë doza do të dërgohen drejt rreth 950 qendrave shëndetësore të komunitetit dhe 20,000 farmacive me pakicë, për ta bërë më të lehtë për njerëzit që të vaksinohen më afër shtëpive të tyre.

“Kaluam një vit të gjatë e të vështirë dhe pikërisht kjo do ta bëjë Ditën e Pavarësisë diçka vërtet të veçantë, ku ne jo vetëm festojmë pavarësinë tonë si komb, por ne fillojmë të shënojmë pavarësinë tonë nga ky virus. Por për të arritur atje nuk mund të anashkalojmë vigjilencën tonë . Kjo luftë nuk ka përfunduar ende”, tha kreu i Shtëpisë së Bardhë.

Me herët presidenti Biden firmosi ligjin e paketë së ndihmës ekonomike prej 1.9 trilionë dollarësh çka sipas presidentit do të ndihmojë për të mposhtur virusin, do të ndihmojë ekonominë shëndetësinë dhe shpërndarjen e ndihmës së drejtpërdrejtë për amerikanët në nevojë.

Shumë prej aksionet e ndihmës do të nisin qe nga kjo fundjavë. Ndërsa paketa e ndihmës ekonomike e cila mori miratimin edhe në Kongres siguron 400 miliardë dollarë të cilat do të jepen në formë pagesash direkte prej 1400 dollarësh për shumicën e amerikanëve, 350 miliardë dollarë ndihmë për shtetet dhe qeveritë lokale, një zgjerim të pagesës për fëmijët dhe rritje të fondeve për shpërndarjen e vaksinave kundër COVID-19-s.