Vaksinimi kundër COVID-19, avancon programi COVAX, 34 milionë doza për vendet e varfra

Kompania “Moderna” do të shpërndajë 34 milionë doza vaksinash kundër COVID-19 këtë vit, ndërkohë që Suedia ka dhuruar 1 milion doza vaksina “AstraZeneca” në kuadër të programit global COVAX, për të ndihmuar në vaksinimin e popujve më të varfër të botës.

Programi i blerjes i arritur me “Moderna” parashikon deri në 500 milionë doza, por shpërndarja do të fillojë vetëm në tremujorin e katërt, me 34 milionë doza që do të jenë në dispozicion këtë vit. Ndërkohë, pjesa dërrmuese e vaksinave, 466 milionë, do të jenë në dispozicion vetëm duke nisur nga viti i ardhshëm.

Marrëveshja rrit numrin e vaksinave në dispozicion për programin COVAX dhe përmban një seri opsionesh për të pasur akses në vaksinat e duhura për variantet e reja që mund të lindin në të ardhmen.