Valë e re sulmesh mes Rusisë dhe Ukrainës, nëntë të vrarë në Kiev

Të paktën nëntë persona kanë humbur jetën dhe dhjetëra të tjerë janë plagosur si pasojë e një vale të re sulmesh mes Rusisë dhe Ukrainës, ndërsa një monument i rëndësishëm fetar në Kiev është dëmtuar rëndë nga flakët.

Sipas autoriteteve ukrainase, katër persona u vranë në sulmet ruse ndaj Kievit, ndërsa pesë punonjës të ekipeve të emergjencës humbën jetën në Kharkiv gjatë përpjekjeve për të shuar një zjarr të shkaktuar nga bombardimet ruse.

Ndër objektet e goditura ishte edhe Katedralja e Fjetjes së Krishtit, një monument i shekullit të 11-të në Kiev. Kryeministrja e Ukrainës, Yulia Svyrydenko, e cilësoi ngjarjen si një “sulm brutal ndaj popullit dhe trashëgimisë sonë”.

Nga ana tjetër, një sulm ukrainas me dron në qytetin rus të Tulës shkaktoi vdekjen e tre personave dhe plagosjen e tre të tjerëve, mes tyre edhe një fëmijë njëvjeçar.

Sulmet me raketa dhe dronë shkaktuan dëme të konsiderueshme në Kiev, duke përfshirë zjarre në ndërtesa dhe automjete. Sipas kryebashkiakut Vitali Klitschko, mbi 140 mijë banorë mbetën pa energji elektrike. Autoritetet raportuan gjithashtu se të paktën 23 persona u plagosën në kryeqytetin ukrainas, ndërsa pesë të tjerë në Kharkiv.

Pjesa më e madhe e territorit të Ukrainës mbeti nën alarm për sulme ajrore gjatë gjithë ditës së hënën