Valuta vendase zhvlerësohet ndaj dollarit, shpërthejnë protestat anti-qeveritare në Iran

Tregtarët iranian dhe dyqanxhinjtë mbajtën ditën e dytë të protestave të hënën në Iran, pasi valuta e vendit ra në një rekord të ri përballë dollarit amerikan.

Pamje të publikuara në rrjetet sociale tregojnë disa qindra njerëz të grumbulluar në Rrugën Saadi, në qendër të Teheranit, si dhe zonën Shush pranë Pazarit të Madh, që luajti një rol kyç në Revolucionin Islamik të vitit 1979, që rrëzoi monarkinë dhe solli në pushtet rendin islamik.

Tregtarët në kryeqytet mbyllën dyqanet dhe u kërkuan kolegëve të bënin të njëjtën gjë. Agjencia gjysmëzyrtare e lajmeve “ILNA” njoftoi se shumë biznese dhe shitës ndalën aktivitetet e tyre, edhe pse disa të tjerë i mbajtën hapur ato.

Për momentin nuk raportohet për ndërhyrje të forcave të policisë, edhe pse masat e sigurisë përreth protestës ishin të forta.

Të dielën, grupet e protestuesve ishin të kufizuara në dy tregje të lëvizshme në qendër të Teheranit, ku demonstruesit bërtitën parulla anti-qeveritare.

Valuta iraniane rial ra të dielën në 1.42 milionë kundrejt dollarit, ndërsa të hënën u këmbye me 1.38 milionë rialë ndaj valutës amerikane.