Vdekja e 39 emigrantëve në kamion, gjykata në Britani shpall fajtorë dy persona

Dy persona u shpallën fajtorë ditën e hënë nga një gjykatë britanike për vdekjen e 39 burrave, grave dhe fëmijëve nga Vietnami, pasi trupat e tyre u gjetën të pajetë në një kamion-frigorifer në afërsi të Londrës vitin e kaluar.

Vdekjet e emigrantëve tronditën Mbretërinë e Bashkuar dhe Vietnamin dhe nxorën në dritë edhe njëherë trafikun në shkallë globale të qenieve njerëzore, që nga vendet e varfër të Azisë, Afrikës dhe Lindjes së Mesme arrijnë Perëndimin.

Eamon Harrison, shoferi 24-vjeçar i kamionit, nga Irlanda e Veriut, u shpall fajtor për vrasjen pa dashje të 39 personave dhe për komplot me qëllim asistimin e emigracionit të paligjshëm.

Edhe Gheorghe Nica, 43 vjeç, u shpall fajtor për të njëjtat akuza. Dy të tjerë ishin shpallur fajtorë më herët për përfshirje në vdekjen e emigrantëve.

Shumica e personave që humbën jetën, të moshave nga 15 në 44 vjeç, ishin nga dy provinca në pjesën veriore dhe qendrore të Vietnamit, ku varfëria, papunësia e lartë, katastrofat mjedisore dhe premtimi për një jetë më të mirë nxisin emigracionin në masë.