Vendet evropiane dhe të Gjirit dënojnë ashpër veprimet e Iranit

Një grup vendesh, përfshirë Emiratet e Bashkuara Arabe, Bahreinin, Mbretërinë e Bashkuar, Francën dhe Gjermaninë, kanë lëshuar një deklaratë të përbashkët ku dënojnë ashpër veprimet e Iranit në Gjirin Persik.

Në deklaratë, këto shtete akuzojnë Iranin për sulme ndaj anijeve tregtare dhe infrastrukturës civile, si dhe për atë që e cilësojnë “mbyllje de facto” të Ngushticës së Hormuzit, një nga rrugët më të rëndësishme të transportit të naftës në botë.

Ata i kanë bërë thirrje Iranit që të ndalë menjëherë kërcënimet, vendosjen e minave detare, si dhe sulmet me dronë dhe raketa, duke theksuar se veprime të tilla përbëjnë shkelje të së drejtës ndërkombëtare.

Deklarata riafirmon gjithashtu se liria e lundrimit, sipas Konventës së OKB-së mbi Ligjin e Detit, është “e paprekshme”.

Shtetet nënshkruese u shprehën të gatshme të mbështesin përpjekjet për garantimin e kalimit të sigurt nëpër ngushticë, ndërsa mirëpritën edhe vendimin e Agjencisë Ndërkombëtare të Energjisë për lirimin e rezervave strategjike të naftës, me qëllim stabilizimin e tregjeve globale të energjisë.