Venecia shmang vendosjen në listën e UNESCO të trashëgimive në rrezik

Venecia ia ka dalë të mos vendoset në listën e UNESCO të trashëgimeve botërore të rrezikuara.

Vendimi i para një muaji për të ndaluar ardhjen e anijeve të mëdha në lagunën e Venecias mendohet se ishte një faktor kyç për vendimin.

Megjithatë, agjencia e Kombeve të Bashkuara i ka kërkuar Italisë që të përpilojë një raport mbi mënyrën sesi Venecia po mbrohet nga turizmi masiv.

“Tani, duhet të kujdesemi që të mbajmë vëmendjen e botës tek Venecia dhe është detyrë e gjithsecilit që të mbrojë lagunën dhe identifikojë rrugë për zhvillimin e qëndrueshëm për këtë realitet unik”, u shpreh Dario Franceschini, ministri italian i Kulturës.

Por,  grupet joqeveritarë që vrojtojnë procesin thonë se ndalimi i anijeve të mëdha është vetëm një prej çështjeve që i kanosen Venecias, ku ndër të tjera janë turizmi masiv, menaxhimi i burimeve kulturore dhe natyrale, si dhe kontrolli i zhvillimit urban.

Piku i turizmit masiv në Venecia ishte në 2019 me plot 25 milionë vizitorë, ndërsa qyteti prej rreth 50 mijë banorësh humbet rreth 1 mijë vendas në vit.

LEXONI GJITHASHTU

• “Jo anije në port”, protesta në Venecia për sigurinë dhe mjedisin
• Italia shijon rihapjen, pronarët e bizneseve në Venecia: Askush nuk mund të na ndalë
• Vaksinimi në Venecia, autobusi kthehet në klinikë lundruese për të arritur ishujt