Vështirësitë e biznesit të vogël, Bujar Muço: Shkak pandemia dhe mungesa e ndihmës nga shteti

Nënkryetari i Shoqatës së Biznesit të Vogël, z.Bujar Muço u shpreh në Euronews Albania se gjendja e biznesit sot në Shqipëri është katastrofike.

Sipas tij, shkak është situata e pandemisë dhe mungesa e një ndihme nga ana e shtetit.

“Si mos më keq e gjen ky fundvit biznesin. Gjendja e biznesit sot në Shqipëri është katastrofike, më e keqja në 30 vitet e fundit, ku ne operojmë në Shqipëri. Shkaqet e kësaj gjendjeje, në radhë të parë është gjendja e pandemisë  që ka ndikuar shumë në gjendjen aktuale të bizneseve. Problematika më të mëdha janë mos-ndihma nga ana e qeverisë karshi bizneseve dhe konsumatorëve. Ne si biznese të vogla dhe të mesme furnizuesin kryesor tonë e kemi nëpërmjet konsumatorit. Nëse konsumatori nuk ka të ardhura ne kemi rënie në xhiro dhe të ardhurat tona”, u shpreh ai.

Z.Muço theksoi më tej se e njëjta situatë është në të gjitha tregjet e vendit, ku është vënë re një rënie e fuqisë blerëse.

“Në të gjithë Shqipërinë është e njëjta problematikë, ku më shumë e ku më pak. Kjo është e përgjithshme, konsumatorët nuk kanë dhe nuk ka fuqi blerëse”, tha ai.

Lexoni gjithashtu:

Tregu i pakicës në Korçë i zbrazur, ankohen tregtarët: Nuk ka blerës, ka rënë ekonomia