Vigjilja e Pashkës katolike, Papa Françesku bën thirrje për shpresë pavarësisht pandemisë

Papa Françesku u bëri thirrje qytetarëve të mos e humbin shpresën pavarësisht “muajve të errët” të pandemisë, teksa celebroi vigjiljen e Pashkës në Bazilikën e Shën Pjetrit.

Për shkak të distancimit social, vetëm rreth 200 persona u lejuan të ndiqnin shërbesën.

Gjithashtu, shërbesa nisi më herët se zakonisht për të respektuar shtetrrethimin, në orën 10 të mbrëmjes.

Ati i shenjtë ndezi qiriun në errësirën e bazilikës dhe më pas shpërndau flakën me të tjerët derisa në bazilikë u ndezën dritat.

Ndërkohë, dhjetëra të krishterë u mblodhën në Kishën e Varrit të Shenjtë në Jerusalem, për vigjiljen e Pashkës.

Kisha në fjalë është ngritur mbi vendin ku besohet se Jezu Krishti u kryqëzua, vdiq dhe u ringjall.

Të pranishmit mbanin veshur maskat mbrojtëse, një shenjë e nënshtrimit të celebrimeve për shkak të pandemisë.

Edhe sirianët e krishterë ndoqën lutjet në kishën e Zonjës së Damaskut, në kryeqytetin sirian, pavarësisht pandemisë.

Qeveria siriane ka regjistruar 19 mijë raste me COVID, përfshirë mbi 1.200 vdekje në dy të tretat e vendit që është nën kontrollin e saj.

Por numri i vërtetë ka gjasa të jetë më i lartë për shkak të kapaciteteve të tkurrura të testimit dhe rasteve asimptomatike.