Vihen nën kontroll zjarret që u morën jetën katër personave në Qipro

Ditën e shtunë në pyjet e komunës “Arakapë” në Qipro nisi një zjarr që u mori jetën katër personave dhe shkatërroi dhjetëra shtëpi si edhe sipërfaqe pyjore dhe të mbjellash.

Nga komuna e Arakapës zjarri më pas u përhap në fshatrat e Eptagonias, Akapnos, Oras, Melini, Sikopetra, Vatsia, Odos dhe Vavatsinias, për t’u vënë nën kontroll vetëm ditën e sotme.

Zjarri shkrumboi mbi 55 mijë kilometra katrorë sipërfaqe pyjore dhe të mbjellash, teksa shkatërroi edhe dhjetëra shtëpi dhe prona private. Katër persona humbën jetën në komunën e Odos, për shkak të zjarrit.

Për shuarjen e vatrave të zjarrit u angazhuan mbi 600 efektivë nga Departamenti i Zjarrfikësve, Policia, Mbrojtja Civile, Garda Kombëtare dhe punonjësit e bashkive dhe komunave. Mbi 70 zjarrfikëse, ashtu si edhe një numër traktorësh bujqësorë u angazhuan për shuarjen e zjarreve.

Presidentja e Komisionit Evropian, Ursula von der Leyen, dhe Presidenti i Këshillit Evropian, Charles Michel shprehën ngushëllimet e tyre për vdekjen e katër personave nga zjarret në Qipro, duke dërguar mesazhin se “Qipro nuk është vetëm”.

Në një postim në Twitter, von der Layen deklaroi se Bashkimi Evropian do të mbështesë Qipron në këtë katastrofë sociale, ekonomike dhe ekologjike.

Për shkak të situatës së emergjencës, u aktivizua plani kombëtar ku u kërkua edhe ndihma e mjeteve ajrore nga jashtë vendit. Plani “Ikarus” 2 ku u përfshijnë 11 aeroplanë dhe dy helikopterë nga bazat ushtarake britanike, dy aeroplanë nga Greqia dhe një nga Izraeli. Për shkak të përhapjes së gjerë të zjarrit, forcat zjarrfikëse kanë qëndruar në terren në rast riaktivizimi të vatrave.

Fakti se zjarri është vënë nën kontroll u bë i ditur nga Departamenti i Pyjeve në Ministrinë e Bujqësisë, Zhvillimit rural dhe Ambientit, në Qipro.

LEXONI GJITHASHTU:

• 130 vatra zjarri aktive në Kanada, raportohen 719 jetë të humbura
• Restaurimi i Notre Dame, si po rindërtohet maja e katedrales së Parisit që u dëmtua nga zjarri