Vijon përkeqësimi i situatës së pandemisë në Indi, 20 pacientë vdesin nga mungesa e oksigjenit

Situata e pandemisë në Indi po përshkallëzon dita ditës për më keq. Të shtunën autoritetet raportuan rreth 347 mijë raste të reja me COVID-19, ndërsa 2,624 pacientë humbën jetën.

Në tre ditët e fundit autoritetet në Indi kanë diagnostikuar rreth 1 milionë persona të prekur nga COVID-19, ndërkohë që në total janë numëruar mbi 16.6 milionë të infektuar dhe mbi 190 mijë persona kanë humbur jetën.

Në spitale gjendja duket kaotike. Shumë qendra shëndetësore kanë shpallur gjendjen e emergjencës për mungesë të oksigjenit. Në Delhi spitali “Jaipur Golden” raportoi 20 humbje jete mes pacientëve me COVID-19 si pasojë e mungesës së oksigjenit.

Organizata Botërore e Shëndetësisë tha në një deklaratë se situata në Indi është tregues se çfarë mund të shkaktojë pandemia e COVID-19.

Në fillim të këtij viti autoritetet indiane pretenduan se e mposhtën pandeminë. Në muajin shkurt rastet ditore ranë nën 11 mijë ndërsa nisën të importoheshin qindra mijëra vaksina. Një muaj më pas autoritetet e shëndetësisë thanë se India “është drejt fundit të tunelit”.

Megjithatë situata u përmbys rreth një muaj më vonë pas dhjetëra aktivitetesh që u mbajtën – si për shembull festivali Kumbh Mela me qindra e mijëra të grumbulluar – prej së cilave infeksioni mund të jetë përhapur ndjeshëm.