Viktimat nga coronavirus, Brazili renditet në vend të dytë pas SHBA

Të premten, Ministria e Shëndetësisë së Brazilit raportoi 909 viktima prej COVID-19, duke u renditur kështu në vend të dytë për numrin më të lartë të vdekjeve pas Shteteve të Bashkuara.

Eskpertët e shëndetësisë kanë parashikuar se piku e epidemisë në Brazil do të mbërrijë në gusht. Virusi i ka marrë jetën rreth 42 mijë brazilianëve ndërkohë që vendi numëron 800 mijë të infektuar.

Dr Michael Ryan, kreu i shtabit të emergjencës në Organizatën Botërore të Shëndetësisë, tha të premten se situata në Brazil është “shqetësuese”, por shtoi se numri i të shtruarve në terapi intensive është nën 80 për qind.

“Në përgjithësi sistemi i shëndetësisë së Brazilit ia ka dalë mbanë deri tani”, tha Ryan, megjithatë “ai ka nevojë për mbështetje në mënyrë që të vlejë e gjithë kjo përpjekje”.

Manaus, kryeqyteti i Amazonës në Brazil, është një ndër qytetet më të prekura të Brazilit. Muajin e shkuar shkalla e vdekshmërisë nga virusi ishte 19.4 persona për 100 mijë banorë, krahasuar me 4.4 në gjithë Brazilin.

Ndërkohë, varrezat e San Paolos kanë arritur në maksimumin e kapacitetit të tyre, duke detyruar shërbimet funerale që të improvizojnë metoda për të krijuar më shumë hapësirë.

Lexoni gjithashtu

Shtohen të infektuarit në SHBA, rreth 2 milionë të prekur me COVID-19

Brazili kërcënon të largohet nga OBSH