Vrasja e Floyd, shpërbëhet departamenti i policisë në Mineapolis

Mazhoranca në Këshillin Bashkiak të Mineapolisit, në Shtetet e Bashkuara, është zotuar se do të shpërbëjë departamentin e policisë, një lëvizje kjo shumë domethënëse pas protestave për vdekjen e George Floyd.

Nëntë nga 13 këshilltarët deklaruan se nevojitet një model i ri për sigurinë publike, në një qytet ku forcat e rendit janë akuzuar shpesh herë për racizëm.

Kryebashkiaku Jacob Frey më herët e kundërshtoi lëvizjen, duke u përballur me reagimin e qytetarëve. Aktivistët, që prej vitesh e kërkojnë një ndryshim të tillë, e quajtën nismën një pikë kthese.

Por shumë druhen se tani Mineapolis do të përjetojë një debat të gjatë dhe kompleks lidhur me policinë dhe mbetet e paqartë se çfarë strukture do të ketë reforma për të.

Vdekja e Floyd teksa ndodhej në duart e policisë shkaktoi protesta masive kundër racizmit dhe brutalitetit policor.

Oficeri Derek Chauvin, që vendosi gjurin mbi qafën e 46-vjeçarit me ngjyrë për të paktën 9 minuta, është shkarkuar nga detyra dhe akuzuar për vrasje të shkallës së dytë.

Tre oficerët e tjerë që ishin në vendin e ngjarjes janë shkarkuar gjithashtu dhe janë akuzuar për ndihmë dhe bashkëfajësi.