Ylli Manjani liston tre detyrat e opozitës në Parlamentin e ri

Juristi, Ylli Manjani shprehet se opozita në legjislaturën e re Parlamentare duhet të luftojë për tre kauza kryesore. Ai listoi hapjen e negociatave për anëtarësimin e Shqipërisë në Bashkimin Evropian, nisjen e një reforme zgjedhore dhe rikthimi i legjitimitetit të pushtetit lokal.

Sipas z. Manjani opozita duhet të punojë për ndryshimin e sistemit zgjedhor pasi sistemi aktual është “hajdut”.

“Opozita në Shqipëri ka tre detyra, e para të garantojë çeljen e menjëhershme të negociatave me BE. E dyta, të fillojë punën në kuadër të një dialogu politik për të ndërtuar sistemin e ri të zgjedhjeve, kjo është më e rëndësishme se çdo gjë tjetër. Dhe e treta të kthejë legjitimitetin e pushtetit lokal. Këto janë tre detyrat mendoj unë që ka një opozitë e përgjegjshme dhe një opozitë që mund të kontribuonte fare mirë për këto çështje”, deklaroi ai.

Sipas ish-ministrit të Drejtësisë “të gjitha të tjerat janë të parëndësishme”, qoftë dhe qëndrimi nëse Parlamenti dhe Gjykata Kushtetuese miratojnë shkarkimin e Presidentit Ilir Meta. Në këtë rast sipas z. Manjani, opozita duhet të mbajë qëndrim vetëm për zbatimin e kushtetutës.