Zakharova: Deklaratat e BE përpjekje për të shmangur përgjegjësinë për përshkallëzimin në Lindjen e Mesme

Deklaratat e zyrtarëve të Bashkimit Evropian, të cilët pretendojnë se nuk janë të përfshirë në ngjarjet në Lindjen e Mesme, përfaqësojnë një shtrembërim të fakteve dhe një përpjekje për të shmangur përgjegjësinë për përshkallëzimin në atë rajon, tha sot zëdhënësja e Ministrisë së Punëve të Jashtme ruse, Maria Zakharova.

“Në ditët e fundit, përfaqësuesja e lartë e BE-së për politikën e jashtme dhe sigurinë, Kaya Callas, dhe disa udhëheqës të Evropës Perëndimore po përpiqen publikisht ta portretizojnë situatën sikur nuk kanë të bëjnë fare me atë që po ndodh në Lindjen e Mesme. Nuk është lufta e tyre, thonë ata. Ne kategorikisht nuk pajtohemi me këtë mënyrë të paraqitjes së çështjes”, tha Zakharova, raporton TASS.

Ajo tha se deklarata të tilla përfaqësojnë “një tjetër shtrembërim të rëndë të fakteve”.

“Është e njohur mirë se qeveritë e Evropës Perëndimore kanë zbatuar politika koloniale në rajon për dekada të tëra, duke u fshehur pas demagogjisë dhe gënjeshtrave të hapura”, theksoi Zakharova.

Ajo shtoi se qeveritë evropiane po pengojnë kërkimin e zgjidhjeve diplomatike për situatën rreth Iranit, me ç’rast, sipas vlerësimit të saj, Brukseli është në të njëjtën pozicion si Shtetet e Bashkuara të Amerikës dhe Izraeli, të cilët nisën sulme ajrore ndaj Iranit më shumë se dy javë më parë.