Zgjedhjet në SHBA, Trump: Fituesi mund të mos shpallet për muaj me radhë

Presidenti Donald Trump deklaroi të premten se amerikanët mund të mos e njohin fituesin e zgjedhjeve të nëntorit për muaj me radhë për shkak të përplasjeve mbi votimet me postë, duke rritur kritikat mbi metodën e votimit që mund të përdoret nga gjysma e votuesve amerikanë këtë vit.

Ekspertët e zgjedhjeve kanë deklaruar se kjo mënyrë mund të kërkojë disa ditë nga 3 nëntori derisa fituesi të merret vesh, pasi zyrtarëve do t’u duhet kohë për të numëruar votat.

Duke folur nga Vrixhinia, Trump tha se do të preferonte të dinte sa më shpejt nëse ishte fitues apo i humbur, sesa të priste për mbërritjen e votave me postë në destinacion.

“Është një katastrofë që pritet të ndodhë. Dhe më mirë se kushdo tjetër këtë e dinë demokratët. Ata e dinë që do të ndodhë dhe duan që të ndodhë sepse dëshirojnë ta kalojnë çështjen në sistemin e drejtësisë. Ndaj, sikurse e kam thënë, nuk do ta dëgjoni emrin e fituesit atë natë. Ka fare pak gjasa që ta dëgjoni,” – u shpreh Trump.

Një vendim i gjykatës i marrë këtë muaj ka lejuar zyrtarët në shtete si Miçigani, Pensilvania, Uiskonsin dhe Karolina e Veriut që të numërojnë votat që mbërrijnë pas 3 nëntorit, përsa kohë ato janë dërguar ditën e zgjedhjeve.