Zgjedhjet rajonale në Francë dështim i të djathtës ekstreme, por edhe rënie në mbështetjen për Macron

Partia e së djathtës ekstreme në Francë, e drejtuar nga Marine Le Pen dështoi të fitojë një rajon të vetëm në raundin e dytë të zgjedhjeve rajonale, të cilat u zhvilluan gjatë ditës së diel.

Provence-Alpes-Côte d’Azur ishte shënjestër e partisë së Marine Le Pen, por sondazhet sugjerojnë se kandidati i saj humbi ndaj republikanëve të qendrës së djathtë.

Zgjedhjet, në të cilat pati një pjesëmarrje rekord të ulët prej më pak se 30% votuesish, sollën gjithashtu zhgënjim për presidentin Emmanuel Macron.

Partia e tij  e qendrës, La République En Marche (LREM), po ashtu nuk arriti të fitonte kontrollin e ndonjë rajoni.

Ishte hera e parë që partia e presidentit Macron merr pjesë në zgjedhjet rajonale, pasi ende nuk ishte krijuar në zgjedhjet  e 2015.

Partitë tradicionale të majta dhe të djathta, socialistët dhe republikanët, arritën të mbajnë pushtetin në një numër të rajoneve të Francës.

Shumë janë të shqetësuar se pjesëmarrja rekord e ulët sinjalizon një krizë në sistemin demokratik të Francës, me “apatinë” elektorale më të lartë në të gjitha kohërat.

Zgjedhjet rajonale u cilësuan edhe një test, pasi pritet të tregojnë prirjen për zgjedhjet presidenciale, të cilat zhvillohen vitin e ardhshëm.

LEXONI GJITHASHTU:

• Zgjedhjet lokale në Francë, Macron dhe Le Pen marrin rezultat zhgënjyes
• Zgjedhjet rajonale në Francë, votohet për balotazhin, Le Pen dhe Macron shpresojnë fitoren