Zhduken 7 futbollistë të Kombëtares së Eritresë

Shtatë futbollistë eritreanë janë zhdukur pas një ndeshjeje kualifikuese për Kupën e Kombeve të Afrikës 2027 në qytetin Lobamba, Eswatini (ish-Svaziland), tha një zyrtar nga Konfederata e Futbollit Afrikan (CAF) për agjencinë franceze të lajmeve (AFP).

“Ky incident është një… mister. Eritrea mundi Esëatinin më 31 mars në Lobamba dhe askush nuk e di me siguri se çfarë ndodhi më pas”, tha zyrtari, i cili dëshiroi të mbetej anonim, dhe vazhdoi:

“Ne besojmë se të gjithë lojtarët u nisën nga Eswatini për në Afrikën e Jugut (ku skuadra ndaloi gjatë rrugës së kthimit nëpërmjet Egjiptit). Por kur delegacioni mbërriti në Kajro, mungonin shtatë lojtarë.” Dhe kjo pas fitores 2-1 jashtë fushe për t’u kualifikuar.

Mungesa e shtatë lojtarëve u konfirmua edhe nga trajneri federal i Eritresë, Hesham Yakan, i cili është egjiptian.

Një anëtar i komunitetit eritrean në Afrikën e Jugut i tha AFP-së se kishte parë disa nga lojtarët e zhdukur në Johannesburg, por nuk pranoi të jepte informacione të mëtejshme, duke përmendur shqetësime për sigurinë e tyre. 

Kombet e Bashkuara vlerësojnë se gjatë 20 viteve të fundit, afërsisht 80 eritreanë të përfshirë në futboll (lojtarë, trajnerë, zyrtarë) kanë dezertuar gjatë ndeshjeve të zhvilluara jashtë vendit.