​Albin Kurti: Dëshmorët janë bartësit e historisë dhe dëshmitarët e një misioni

Kryeministri i Kosovës, Albin Kurti ka përkujtuar Ditën e Dëshmorëve, duke thënë se 5 maji i bashkon luftëtarët shqiptarë të të gjitha viseve dhe kohëve, që ranë për lirinë tonë të përbashkët.

“5 maji i bashkon luftëtarët shqiptarë të të gjitha viseve dhe kohëve, që ranë për lirinë tonë të përbashkët. Dëshmorët na bashkojnë. Detyrën ndaj tyre do ta kemi kryer nëse një pjesë e ëndrrës së tyre gjendet e realizuar gjatë jetëve dhe veprimeve tona”, shkruan Kurti.

Përmes një statusi në Facebook, Kurti ka thënë se dëshmorët janë bartësit e historisë dhe dëshmitarët e një misioni.

“Dëshmorët janë mbartësit e historisë dhe dëshmitarët e një misioni. Dhe nuk ka më drejt se t’i mendosh të prehen nën monumentin e Nënës Shqipëri”, shkruan ai.

Ai shprehet se nëse historia do shkruhej sipas frymës që themeloi akti i tyre, popujt do ta kishim edhe më të qartë idenë e prejardhjes dhe destinacionin e tyre.

“Nëse historia jonë e përmban dëshminë e tyre, ajo na dëfton prej nga vijmë. Nëse historia shkruhet sipas frymës që themeloi çdo herë akti i tyre, atëherë ne do të dimë sigurisht se kah shkojmë”, theksoi ai.