​Kurti takim me Lajçak: Diskutuam marrëdhëniet BE-Ballkani Perëndimor

Kryeministri Albin Kurti ka folur pas takimit me emisarin evropian për dialogun Kosovë-Serbi, Miroslav Lajçak.

Me një shënim në “Twitter”, Kurti bën të ditur se kanë diskutuar për takimin e ardhshëm Kosovë-Serbi në kuadër të dialogut, por dhe për zhvillimin e marrëdhënieve të Ballkanit Perëndimor me BE-në.

“Ne diskutuam marrëdhëniet BE-Ballkani Perëndimor, si dhe takimet e mëparshme dhe të ardhshme të dialogut me Miroslav Lajçak”, shkruan Kurti.

Ai thekson se Ballkani Perëndimor nuk ka alternativë tjetër, përveçe integrimin në Bashkimin Evropian.

“Ne u pajtuam për rëndësinë e afrimit të perspektivës së BE-së me njerëzit dhe se nuk ka alternativë për procesin e zgjerimit të BE-së për rajonin e Ballkanit Perëndimor”, tha Kurti.

Takimi mes Kurtit dhe Lajçak u mbajt sot në “Forumin Strategjik në Bled” të Sllovenisë. Kryeministri Kurti u shpreh se Kosova është vend me qasje pro-perëndimore dhe rruga e saj e vetme është integrimi në Bashkimit Evropian dhe bërja pjesë e Aleancës së Atlantikut të Veriut (NATO).