​Ministrja e Drejtësisë në Kosovë: Mos-zgjedhja e Presidentit e dërgon vendin në zgjedhje

Ministrja e Drejtësisë në Kosovë, Albulena Haxhiu thotë se më 14 shkurt qytetarët votuan për emrin e kandidatit për kryeministër, por edhe për emrin e kandidates për presidente.

Nëpërmjet një postimi në Facebook, ministria shkruan se mesazhi i qytetarëve ka qenë i qartë, por ky mesazh e vullnet nuk po përfillet nga opozita.

Ajo thotë nuk kanë çfarë t’i bëjnë atyre që mendojnë që për votën e presidentit, duhet dhënë terminale doganore, poste diplomatike apo tenderë.

“Ne nuk i kemi pasur 80 vota për Presidentin. Ata që po thonë se e paskemi provokuar situatën me ligjin sepse votat i keni pasur, janë të njëjtit që thoshin se A.Veliu nuk është dashur të shkarkohet se ai veprim e provokoi rrëzimin e qeverisë edhe pse dihej që qeveria s’ka pasur në plan të votohej, po kur u votua ka pasur plan të rrëzohet”, shkruan ajo.

Mes tjerash, ajo shton se nuk i duan zgjedhjet por mos-zgjedhja e presidentit e dërgon vendin në zgjedhje.

“Ne nuk i duam zgjedhjet por mos-zgjedhja e Presidentit e dërgon vendin në zgjedhje.  Prandaj përgjegjësia për këtë i mbetet atyre që e injorojnë vullnetin e qytetarëve dhe e bllokojnë zgjedhjen e Presidentit”, përfundon zonja Haxhiu.

Lexoni gjithashtu:

Kërcënimi i Kurtit: Ose mbi 80 vota në kuti për Osmanin, ose mbi 500 mijë vota për LVV-në

Kriza politike në Kosovë, Mexhide Demolli: Duhet të merrej opinion nga Komisioni i Venecias