​Qeveria e Kosovës jep 100 mijë euro ndihmë për Preshevën

Kosova ka shpërndarë 100 mijë euro për Komunën e Preshevës, pas dëmeve që u shkaktuan nga reshjet e dendura të shiut.

Në mbledhjen e qeverisë së Kosovës, kryeministri Albin Kurti ka theksuar se për Preshevën janë ndarë mjete nga Bashkia e Tiranës dhe nga Komuna e Prishtinës.

“U informova gjerësisht për dëmet e shkaktuara nga reshjet në komunën e Preshevës, dhe kapin vlerën totale 325 mijë euro. Deri më tash Bashkia e Tiranës i ka ndihmuar me 50 mijë, komuna e Prishtinës me 50 mijë euro”, tha Kurti.

Ministri i Financave, Hekuran Murati është shprehur se mjetet financiare nuk e mbulojnë tërësisht dëmin, por ky veprim sipas tij është shenjë solidarizimi me shqiptarët që jetojnë në Luginën e Preshevës.

“Me këtë vendim parashikohet të ndahen mjete financiare në vlerë prej 100 mijë euro, dhe kjo në emër të ndihmës për mbulimin pjesërisht pas dëmeve nga vërshimet në komunën e Preshevës. Këto mjete financiare, nuk është se mbulon tërësisht, por së paku është një solidarizim i Qeverisë së Kosovës me vëllezërit tanë andej kufirit. Mjetet financiare të këtij vendimi merren ngaprogrami i shpenzimeve të paparashikuara, kategoria e shpenzimeve-rezervë”, shprehet ai.

Kryeministri i Kosovës, Albin Kurti ka bërë të ditur se Serbia ende nuk ka ndarë asnjë shumë monetare për këtë fatkeqësi natyrore, që goditi Komunën e Preshevës pak ditë më parë.

LEXONI GJITHASHTU: 

• Presheva goditet nga katastrofa natyrore, kërkohet ndihmë nga Shqipëria dhe Kosova