​Rifillojnë gërmimet për mbetjet mortore të viktimave të luftës në Kizhevak

Këtë të mërkurë kanë filluar në Kizhevak të Rashkës, Serbi, gërmimet për mbetjet mortore të viktimave të luftës së viteve 1998-99 në Kosovë.

Përfaqësuesit e delegacionit të Kosovës në kuadër të Grupit Punues për Persona të Zhdukur, kanë qëndruar në lokacionin e varrezës masive në Kizhevak, Serbi, me rastin e rifillimit të gërmimeve. Pjesë e gërmimeve janë ekspertët mjekoligjorë nga Kosova, në kuadër të Grupit Punues për Persona të Zhdukur.

Sic njofton Zyra e Kryeministrit të Kosovës, gërmimet vlerësuese dhe zhvarrosjet e mbetjeve mortore të viktimave të luftës do të vazhdojnë në këtë pjesë së paku për dy javë rresht.

“Ekspertët mjekoligjorë të Republikës së Kosovës, do të vazhdojnë të jenë në lokacionin e varrezës masive deri në përfundim të procesit”,  thuhet në njoftim.