Rreth 1.2 kg kokainë brenda servisit, arrestohet 50-vjeçarja në Lezhë

Policia e Lezhës ka arrestuar 50-vjeçaren me iniciale V.P, pasi është kapur me rreth 1.2 kg kokainë. Ndërkohë është shpallur në kërkim ish-bashkëshorti i saj, me iniciale D. M., 52 vjeç.

“Sekuestrohen rreth 1.2 kg lëndë narkotike e dyshuar kokainë. Vihet në pranga një 50-vjeçare, shpallet në kërkim ish-bashkëshorti i saj.

Në vijim të punës për parandalimin, evidentimin dhe goditjen e veprimtarisë kriminale të shpërndarjes së drogave të forta, në bazë të informacioneve të marra në rrugë operative, u organizua dhe finalizua operacioni policor i koduar “Stacioni”, në kuadër të të cilit u bë kapja dhe arrestimi në flagrancë i shtetases: V. P., 50 vjeçe, banues në Ishull, Lezhë.

Gjithashtu u shpall në kërkim ish-bashkëshorti i saj, shtetasi D. M., 52 vjeç, banues në Ishull, Lezhë, i dënuar më parë për vjedhje, i cili ishte me masë sigurie “Arrest në shtëpi, për veprën penale “Prodhimi dhe shitja e narkotikëve”, thuhet në njoftimin e Policisë.

Policia sqaron më tej se droga është gjetur në servisin në pronësi të shtetasit D. M, që ishte i përshtatur si banesë për ish bashkëshorten e tij.

“Mbi bazën e informacioneve të siguruara së në Ishull, Lezhë, këta shtetas posedonin lëndë narkotike, shërbimet e Policisë kanë ndërhyrë në servisin në pronësi të shtetasit D. M., që ishte i përshtatur si banesë për ish bashkëshorten shtetasen V. P. Gjatë kontrollit të ushtruar në këtë ambient, shërbimet e Policisë gjetën dhe sekuestruan 1.184 kg lëndë të dyshuar kokainë dhe një peshore elektronike. Materialet iu referuan për veprime të mëtejshme, Prokurorisë së Rrethit Gjyqësor Lezhë, për veprën penale ‘Prodhimi dhe shitja e narkotikëve’ e kryer në bashkëpunim”, njofton Policia.