100 ditët e para të qeverisë Kurti, qëndrimet pro dhe kundër të analistëve për premtimet e kryeministrit

Analistët Fidan Uka dhe Xhevdet Pozhari ndanë për Euronews Albania qëndrimet pro dhe kundër qeverisjes së Albin Kurtit në 100 ditët e para në krye të qeverisë së Kosovës.

Sipas analistit Pozhari, tema e dialogut me Serbinë ka dominuar më tepër në media dhe është një temë që nuk varet nga vullneti i z. Kurti.

Ai vlerësoi mënyrën se si Kurti e menaxhoi situatën e pandemisë, në një kohë që kur e mori pushtetin, Kosova nuk kishte siguruar asnjë vaksinë anti-COVID.

“Kurti ka siguruar 1,2 milionë vaksina, që pritet të vijnë në Kosovë, ndërsa deri në fund të vitit pritet të vijnë 2 milionë vaksina”, tha analisti Pozhari.

Ndërkohë, për analistin Fidan Uka, z. Kurti ka bërë premtime të mëdha përpara se të vinte në pushtet, një pjesë të të cilave sipas tij, i ka harruar që tani.

“Një pjesë të premtimeve i ka harruar. Vendimi që shkaktoi zemërim ishte ulja e pensioneve për shtresën më të prekur. Kemi deklaratat skandaloze të ministres së Jashtme, duke barazuar gjenocidin serb me luftën e UÇK. Pastaj është edhe shkarkimi i ambasadorëve”, tha z. Uka.

Ai vlerësoi si pozitive qasjen e Kurtit ndaj procesit të dialogut me Serbinë, ftesën që kryeministri u bëri partive opozitare që të jenë bashkëpunuese me qeverinë në proces dhe ftesën ndaj ekspertëve që kanë qenë në të kaluarën pjesë e bisedimeve në mënyrë që Kosova të përfaqësohet sa më mirë.

Nga ana tjetër, hap pozitiv sipas z. Uka, është dhe propozimi i temave për herë të parë nga Kosova në Bruksel, ku z. Kurti propozoi katër tema për palën serbe.

LEXONI GJITHASHTU:

• “Dialogu me letrat e vjetra”, Xhavit Haliti: Negociatat nuk fillojnë nga zero
• Ganimete Musliu: Kryeministri Kurti mashtroi Kosovën për dialogun