13 partitë aleate i sollën mbi 62 mijë vota koalicionit të PD-së

Rreth 10 për qind, ose 62,589 vota të koalicionit “Aleanca për Ndryshim” e Partisë Demokratike, u sollën nga 13 partitë aleate në zgjedhjet e 25 prillit.

Votat e secilës parti aleate është e vështirë të llogariten, por duke llogaritur numrin e votave preferenciale për kandidatët mund të krijohet një përafrim.

Nga 153 kandidatë në listën e koalicionit PD-AN, 24 kandidatë ishin të partive aleate dhe 129 kandidatë të PD-së.

62,589 persona kanë votuar për kandidatët e partive aleate të PD-së, në zgjedhjet e 25 prillit. Krahasuar me zgjedhjet e vitit 2009 dhe vitit 2013, aleatët e PD-së kanë marrë më pak vota.

Në zgjedhjet e vitit 2009 ata morën rreth 102 mijë vota dhe në zgjedhjet e vitit 2013, rreth 152 mijë vota.

Në zgjedhjet e vitit 2017 votat për këto parti nuk mund të përcaktohet pasi ato kandiduan në një listë me PD-në dhe atëherë nuk votohej për kandidatët.

Partia aleate më e votuar është PDIU, me 16 630 vota, e ndjekur nga Partia Lëvizja e Legalitetit, PLL  me 12 376 vota, Partia Agrare Ambjentaliste, PAA me 8 190 vota dhe Partia Republikane, PR me 8 149 vota.

Shpëtim Idrizi, kryetar i PDIU-së ishte kandidati më i votuar ndër aleatët e PD-së, i dyti ishte Fatmir Mediu i PR dhe i treti Petrit Doda i PLL. Vetëm 7 kandidatë të partive aleate fituan mandat në Kuvend.