15 raketa në Kharkiv, të paktën 7 të vrarë në qytetin e dytë më të madh të Ukrainës

Të paktën 7 persona janë vrarë dhe një dyzinë të tjerë janë plagosur si pasojë e një sulmi rus me raketa në qytetin e Kharkivit, në veri-lindje të Ukrainës.

Lajmin e kanë bërë të ditur autoritetet lokale, sipas të cilave dy persona të tjerë konsiderohen të humbur pas sulmit ndaj qytetit të dytë më të madh të Ukrainës, i cili u godit plot 15 herë.

Për shkak të sulmit, godina të shumta janë shembur dhe rrjeti hekurudhor është dëmtuar, me një nga punonjësit e tij që ka mbetur i plagosur.

Më herët gjatë muajit, forcat ruse nisën një ofensivë të re në rajon në përpjekje për të përçarë vijën e dobësuar ukrainase të frontit.

Të mërkurën, autoritetet në Kiev deklaruan se luftimet po vijonin në afërsi të qyteteve Pletenivka dhe Vovçanskut dhe se trupat vendase kishin gjithçka nën kontroll.

Presidenti Volodymyr Zelensky deklaroi se sulmet në Kharkiv tregojnë se Rusia po përfiton nga mungesa e sistemeve mbrojtëse ajrore.

Furnizimet me sistemet raketore amerikane tokë-ajër u vonuan nga mosmarrëveshjet në Kongresin e Shteteve të Bashkuara mbi paketën e ndihmës për Ukrainën, që u miratua vetëm muajin e kaluar.

Zelensky u ka bërë vazhdimisht thirrje aleatëve për më shumë sisteme mbrojtëse dhe për avionë modernë luftarakë.

LEXONI GJITHASHTU:

• Rusia pretendon se rrëzoi dhjetëra raketa dhe dronë ukrainas
• SHBA: Rusia ka dislokuar armë antisatelitore në hapësirë