17 inspektorë mangët në ILD, s’ka aplikime

ILD ka 17 inspektorë mangët. Prokurorët dhe sidomos gjyqtarët hezitojnë të aplikojnë për këtë post.

Kjo mungesë inspektorësh ka mbledhur mbi 4.300 dosje me ankesa të qytetarëve dhe institucioneve, ndaj prokurorëve dhe gjyqtarëve. Vetëm 1600 prej tyre janë trajtuar.

Nga këto, Artur Metani ka përfunduar hetimin për 22 dosje dhe ka kërkuar shkarkimin për 12 gjyqtarë dhe prokurorë.

Ligji përcakton se inspektorët duhet të jenë 26 por aktualisht janë vetëm 9 në detyrë . Edhe pse një inspektor gëzon statusin e gjyqtarit të apelit përsëri nuk ka interes për këtë detyrë.

 “Janë shpallur 6 apo 7 herë thirrjet nga Këshilli i Lartë Gjyqësor për magjistratë gjyqtarë dhe nuk ka pasur asnjë interesim, zero aplikime nga magjistratë gjyqtarë,” – u shpreh Inspektori i Lartë i Drejtësisë, Metani.

Përveç shkarkimeve, Inspektorati i Lartë i Drejtësisë ka ulur pagat e 2 gjyqtarëve si masë disiplinore dhe ka pezulluar për 6 muaj gjyqtaren e Elbasanit, Enkeleda Kapadeni pas videos së saj në Tik Tok.

LEXONI GJITHASHTU:

• ILD kërkon ulje page me 40% për 2 gjyqtarë të Apelit Vlorë