1893 hektarë tokë janë nën ujë në qarkun Shkodër, probleme edhe në aksin Librazhd-Prrenjas

Pavarësisht rënies së intensitetit të reshjeve, në Shkodër është rritur hapësira e përmbytur.

Sipas raportit të fundit të emergjencave civile, 1893 hektarë në territorin e Bashkisë Shkodër janë nën ujë.

Njësia më e prekur është Ana e Malit, ku rruga e Obotit vijon të mbetet e bllokuar për mjetet e ulëta. Ujësjellësi i Oblikës ka dalë jashtë funksionit, ndërsa, ndërsa UKSH ka furnizuar me ujë të pijshëm banorët. Problematike situata paraqitet dhe në njësinë Dajç, ku është bllokuar segmenti në vendin e quajtur Urrelat që lidh fshatrat Shirq me Darragjat.

Reshjet kanë shkaktuar probleme dhe në njësitë Gur i Zi, Velipojë, Bërdicë dhe Rrethina.

Ndërkohë, probleme nga reshjet ka pasur dhe në qytetin e Librazhdit, ku si pasojë e motit të keq ka pasur rënie gurësh dhe inertesh në aksin rrugor Librazhd-Prrenjas, që kanë çuar në bllokimin e rrugës për disa minuta.

Reshjet e ditëve të fundit i çuan prurjet e lumit Shkumbin në 800 m3 në sekondë.

Në zonën e Orenjës, 2 familje janë larguar nga banesat e tyre për shkak të rrëshqitjeve të dherave, të cilat kanë dëmtuar ambientet ku jetonin. 

Lexoni gjithashtu:

Përmbytjet në vend, Haki Çako në Euronews Albania: Situata drejt përmirësimit

1823 hektarë tokë nën ujë në Shkodër, Oboti dhe Dajçi janë zonat më problematike