Pas shtimit të destinacioneve të reja në Londër, Athinë, Duseldorf, ‘Air Albania’ ka shtuar edhe 2 destinacione të reja.

Nga Aeroporti Ndërkombëtar i Kukësit tani do të fluturohet dhe drejt Zyrihut dhe Baselit.

Përveç, këtyre destinacioneve, ‘Air Albania’ tashmë fluturon edhe drejt Antalias dhe Bodrumit.

Lista do zgjerohet akoma pasi kompania që mban flamurin shqiptar pritet të lajmërojë destinacione të reja së shpejti.

Ky shtim destinacionesh dhe kërkesës së shtuar për fluturim pas pandemisë, ka sjellë edhe nevojën për zgjerim të flotës së avionëve.

‘Air Albania’ në bashkëpunim me ‘Turkish Airlines’, njofton shtimin e 2 avionëve të rinj.

Pas ‘Naimit’, ‘Migjenit’ dhe ‘Lasgushit’, 2 avionët e rinj do t’i shtohen flotës së ‘Air Albania’ gjatë muajve të verës.

Në fillim të javës së ardhshme, CEO i ‘Air Albania’, Sinan Dilek do të udhëtojë drejt SHBA, ku do të marrë pjesë në ceremoninë e firmosjes së marrëveshjes me ‘GA Telesis’, partneri amerikan i mundësimit të 2 avionëve të rinj AirBus 320 me kapacitet maksimal prej 180 ndenjësesh.

Shtimi i dy avionëve të rinj duket se shënon rikthimin në normalitet të fluturimeve pas pandemisë.